Search

റീത്ത്

ഉച്ചമയക്കത്തിനു വിരിച്ച കീറപ്പായയില്‍ 
പുളിച്ച ഛര്‍ദ്ദിലിന്റെ മണം
ശീതീകരിച്ച മുറിയില്‍ നിന്നു വന്ന ഏമ്പക്കത്തിന്
വേവിച്ചെടുത്ത മനുഷ്യമാംസത്തിന്റെ ഗന്ധം
നാടുചുറ്റി വരുന്ന രാജാവിനു കാണിക്കവെക്കാന്‍
വെടിയുണ്ടകള്‍ പിന്നെയും ശബ്ദിച്ചുകൊണ്ടിരുന്നു
കല്‍ബുര്‍ഗിയും ഗോവിന്ദ പന്‍സാരെയും
കൊല്ലപ്പെട്ടിട്ടില്ല
കാരണം
മോദിയുടെ ഇന്ത്യ കൂടുതല്‍ സ്വതന്ത്രമാണ്
എല്‍കെജി ക്ലാസിലെ കുട്ടികള്‍
ഇംപോസിഷന്‍ എഴുതിപ്പഠിച്ചു
ഹ്യൂമന്‍ പാര്‍ട്‌സ് എവൈലബ്ള്‍ ഹിയര്‍
ഇറച്ചി മാര്‍ക്കറ്റില്‍ തൂക്കിയിട്ട 
പുതിയ ബോര്‍ഡ് കണ്ട്
ഇസ്രയേലില്‍ കുടിയിരുത്തപ്പെട്ട പശുക്കുട്ടി ഊറിച്ചിരിച്ചു
സര്‍വ്വാധിപത്യത്തിന്റെ കൊലച്ചിരി
പരിണാമത്തിന്റെ പുതിയ സൂത്രവാക്യങ്ങളുമായി
ഡാര്‍വിന്‍ പുനര്‍ജനിക്കുന്നത്
കണ്ടിരിക്കാന്‍ നല്ല സുഖമുണ്ട്
കണ്ണോക്കിന്റെ ചോറു തിന്നാന്‍
കാത്തിരിക്കുന്നതിന്റെ സുഖം
ഉപ്പ കഴിച്ചത് ആട്ടിറച്ചിയാണെന്ന് തെളിഞ്ഞാല്‍
എന്റെ ഉപ്പയുടെ 
ജീവന്‍ തിരിച്ചു തരുമോ സാറേ
ദാദ്രിയിലെ അഖ്‌ലാഖിന്റെ മോളുടെ നിലവിളി
ഇന്നെന്റെ മൊബൈലിന്റെ റിംഗ്‌ടോണാണ്
പുതിയ പാട്ടുവരുമ്പോള്‍ അതും മാറും
ദയവു ചെയത് അല്‍പം മാറി നില്‍ക്ക്
കണ്ണും കാതും നാക്കും തുന്നിച്ചേര്‍ത്ത
ഈ റീത്തൊന്നു ഞാന്‍ സമര്‍പ്പിച്ചുകൊള്ളട്ടെ
ഗ്രാമസഭ നിയമസഭ ലോകസഭ
തെരഞ്ഞെടുപ്പുകള്‍ നിര്‍ബാധം തുടരട്ടെ,
ശവത്തിനു  കാവല്‍ നില്‍ക്കാനും വേണമല്ലോ
തെരഞ്ഞെടുത്തയക്കപ്പെടുന്ന കുറേയാളുകള്‍