Search

യൂസുഫിന്റെ കുപ്പായം

യൂസുഫിന്റെ കഥ

ദൈവം കുപ്പായം കൊണ്ട് പറഞ്ഞ കഥയാണ്

പൊതുവായ പലതിനും വേണ്ടി

ജയിലില്‍ പോയ പലരുമുണ്ട്

സ്വന്തം സദാചാരത്തിനു വേണ്ടി

ജയിലില്‍ പോയ സുന്ദരനാണ് യൂസുഫ്

തുടിക്കുന്ന യൗവനത്തിന്റെ

പൊരുതുന്ന പ്രതീകം

പക്ഷേ താങ്കള്‍

കുപ്പായത്തില്‍ കൊത്തിവെക്കപ്പെട്ട

യൗവനത്തിന്റെ ആള്‍ദൈവമാകരുതെന്ന്

ദൈവത്തിന് നിര്‍ബന്ധമുണ്ടായിരുന്നു

താങ്കള്‍ വ്യാഖ്യാനിച്ചത്

സ്വപ്നങ്ങളെയല്ല

യാഥാര്‍ഥ്യങ്ങളെ തന്നെയാണ്

പ്രതിസന്ധിയായിരുന്നു 

താങ്കള്‍ക്കെപ്പോഴും പരിഹാരം

ജയില്‍ അധികാരത്തിന്റെ

വിക്ഷേപണ കേന്ദ്രമാണെന്ന്

പോരാളികളെ പഠിപ്പിച്ചത് താങ്കളാണ്

വിശുദ്ധിയും പോരാട്ടവും 

പാകത്തില്‍ ഒരുമിച്ചാല്‍

സൂര്യനും ചന്ദ്രനും നക്ഷത്രങ്ങളും

ചെറുപ്പത്തിനു മുന്നില്‍

സാഷ്ടാംഗം ചെയ്യും

പോരാളിയുടെ കുപ്പായത്തിന്റെ

മണം പോലും

വാര്‍ധക്യത്തിനു വെളിച്ചമാകും. 

 

 

 

**************************************************

**************************************************

 

 

 

പാഴ്ജന്മം

-സൈനബ്, ചാവക്കാട്-

 

ചൂഴ്‌ന്നെടുക്കണം,

എനിക്കെന്റെ

കണ്ണുകളെ,

ചവച്ചു തുപ്പുന്നവന്റെ

നഖത്തില്‍ കുരുങ്ങിയ

കരളുകളുടെ

പിടപ്പ് കാണാത്ത

കണ്ണുകളെന്തിന്?

 

വെട്ടിമാറ്റണം,

മരവിച്ച കൈകളെ,

നിറം മങ്ങിയവന്റെ

നിറങ്ങളെ കാക്കാന്‍

ഉദരത്തില്‍ കല്ല് കെട്ടി

കിടങ്ങൊരുക്കാത്ത

കൈകളെന്തിന്?

 

അഹന്തയുടെ

ചെങ്കോലും

കിരീടവും

വലിച്ചാഴ്ത്താന്‍

ഒരു കടലും താണ്ടാത്ത

കാലുകളും വേണ്ടെനിക്ക്......

 

പറിച്ചെറിയണം,

ദിക്കുകളെട്ടിലേക്കും

തേറ്റകള്‍ നീട്ടി മേയുന്ന

സത്വങ്ങളെ കണ്ടിട്ടും

ഉണരാത്ത ഹൃദയത്തെ...

 

അരിഞ്ഞെടുത്തേക്കുക,

ഉഗ്രവിഷം ചേര്‍ത്ത

കീലങ്ങളില്‍ 

ഉറച്ചുപോയ

സിംഹാസനങ്ങളെ കണ്ട്

ഉള്‍വലിഞ്ഞ

നാവിനെ.....

 

പുനര്‍ജനിക്കണം,

ചത്ത വാസരങ്ങളുടെ

ശ്മശാനഭൂമിക വിട്ട്

പുതിയൊരു

കാഹളമൂത്തിന്റെ

വാഴ്‌വിലേക്ക്......