Search

പുഴയെ തിരയുന്ന മഴത്തുള്ളികൾ

മലയുടെ ഇറച്ചിത്തുണ്ടുകൾ
ഒന്നൊന്നായി വീഴുമ്പോൾ
പുഴ ഞരങ്ങി
ഭൂപടത്തിൽ റോഡ് തിളങ്ങി

മീൻ നീന്തിയ വഴിയേ
ഇപ്പോൾ സ്ക്വാഡ പായുന്നു 
തോണി തുഴഞ്ഞ വഴിയേ
സീബ്രാ ലൈനുകൾ

മീൻ മുതുകിലെ വരപോൽ 
ആറുവരിപ്പാതകൾ
ചൂണ്ടയിടാനിരുന്ന കൽപ്പടവിൽ
ടോൾ പിരിവ് കേന്ദ്രങ്ങൾ

തണുത്ത കാറ്റ് വീശിയ വഴിയേ
സൈലൻസർ പുകച്ചുരുൾ
പങ്കായം ചുഴറ്റിയ ഓളങ്ങളിൽ
എഞ്ചിൻ മുരൾച്ചകൾ

ഔഷധച്ചെടി തളിർത്ത കരയിൽ
ഹൈടെക് ആശുപത്രികൾ 
പാമ്പിഴഞ്ഞ വരമ്പുകളിൽ 
ബ്രേക്കമർത്തിച്ചവിട്ടിയ പാടുകൾ

ചീനവലയിൽ മീൻ പിടച്ചപോൽ
ആംബുലൻസിൽ ജീവന്റെ കുതറൽ

മഴ പെയ്യുന്ന നേരത്ത്
പതിനെട്ടാം നിലയിലിരുന്ന്
ഞാനിപ്പോൾ പുഴയെന്ന 
കവിതയെഴുതുന്നു

ചേരിയിലെ ഓരോ കുടിലിലും 
കയറിയിറങ്ങി മഴ
പുഴയെ തിരയുന്നു.

 l