കണക്കു പുസ്തകം
അഷ്‌റഫ് കാവില്‍
കച്ചവടം
കൊറോണ കൊണ്ടുപോയ്...
കൃഷി
പെരുമഴ കൊണ്ടുപോയ്...
റിയല്‍ എസ്റ്റേറ്റ് ബിസിനസ്
പൊളിഞ്ഞു പാളീസ്സായി....
ചെണ്ട, മദ്ദളത്തിനോടെന്ന പോലെ
ഓരോരുത്തരും
അന്യോന്യം-
ആവലാതികള്‍ പങ്കുവെക്കുന്നു...
അസമാധാനത്തിന്റെ
കരിനിഴല്‍ വീണ മുഖങ്ങള്‍
വിവര്‍ണമായി തുടരുന്നു...
യഥാര്‍ഥ നഷ്ടക്കാരില്‍
ഇവരിലാരെങ്കിലും പെടുമോ?
ഒരിക്കലുമില്ല;
ചാകരയൊത്തു വരുമ്പോള്‍
അവരുടെ വള്ളങ്ങള്‍
ഇനിയുമിനിയും നിറയും
ഈ കാലത്തെ, അവരോ
അവരെ, ഈ കാലമോ?
ഓര്‍ക്കുകയുണ്ടാവില്ല.
* ആത്മാവ് നഷ്ടമായവനാണ്
എല്ലാം നഷ്ടപ്പെട്ടവന്‍'
ഉടലിന്റെ ഉത്സവത്തില്‍
സ്വയം മറന്നു പോയവന്‍
പരമനിസ്വന്‍.
* വിശുദ്ധ ഖുര്‍ആനില്‍ പരാമര്‍ശിക്കപ്പെട്ട
ആശയം (അല്‍ബഖറ)
Comments