എ.പി.എല്‍
ബൈജു ടി. ഷയ്ബു കോരങ്ങാട്‌
മൂലക്കുവെച്ചനാലുത്തരത്തിനോടും
ഭിത്തി പറയുന്നു,
പിടിച്ചുനില്‍ക്കാന്‍-
കഴിയാതെ അടിത്തറ-
ആരോ പിടിച്ചുലക്കുന്നുവെന്ന്,
പറയാതെ തന്നെ
അതിന്റെ ഫീലിംഗ്
അറിയുന്നുവെന്ന്
താഴോട്ടുപതിക്കാന്‍
വെമ്പുന്ന മടലുകളെ-
പേടിച്ചിരിക്കുന്ന ഓടുകളും പറയുന്നു
കിടപ്പുമുറിയിലെ, നരച്ച
കാവിതറയില്‍, രണ്ടുകാലറ്റ്-
ആരെയും താങ്ങാതെ-
മൂലയില്‍ നില്‍ക്കുന്ന-
കട്ടിലിനും എന്നും പരാതി,
വേണ്ടതും വേണ്ടാത്തതും
പുറത്തേറ്റിമടുത്തെന്ന്
കാവല്‍ഭടനെപ്പോലെ
മുറ്റത്ത് നിന്ന മരം
കാറ്റിനോട് തോറ്റിന്നലെ
കടപുഴകി വീണ് ആകെ-
ഉണ്ടായിരുന്ന ജനല്‍ ചില്ലും തകര്‍ത്തു.
ഈ രാത്രിയിലുമുണ്ട്
കാറ്റിന്റെ ആരവം, എന്നാലും
ഞാനിപ്പഴും ഈ പഴഞ്ചന്‍
വീട്ടിലിരുന്ന് സ്വപ്നങ്ങള്‍
നെയ്യുകയാണ്
എന്റെ കൈയിലുണ്ടല്ലോ...
ഒരു കോടിയുടെ
നാളത്തെ ടിക്കറ്റ്
ഭാഗ്യവശാല്‍ കോടിപതി
ഞാനായാല്‍
റേഷന്‍കാര്‍ഡില്‍ പോലും
ഒരുതിരുത്തല്‍,
ആവശ്യമില്ലല്ലോ....
കാരണം,
നാലു സെന്റു സ്ഥലവും
നാടന്‍ പണിയുമുള്ള
ഞാന്‍ ഇപ്പഴും എ.പി.എല്‍
തന്നെയാണല്ലോ
Comments