കുതിരകള്‍ അവളെയന്വേഷിക്കുന്നുണ്ട്...
കുതിരകള്‍ക്കറിയില്ലല്ലോ
അവളെവിടെയാണ് ഓടിമറഞ്ഞതെന്ന്
കാണാമറയത്തേക്ക് മേഞ്ഞെത്തുമ്പോള്‍
അവറ്റകളെയുമന്വേഷിച്ച് അവള്‍
കുന്നിറങ്ങി ഓടിയെത്താറുണ്ടായിരുന്നു...
ഇന്ന് അവളെയുമന്വേഷിച്ച് അവറ്റകള്‍
ആ കുന്നിന്‍ചെരുവില്‍ ഒരുപാട് നടന്നുകാണണം..
എത്രയന്വേഷിച്ചിട്ടും അവളെ കാണാതായപ്പോള്‍
അവ ഒറ്റക്ക് വീട്ടിലേക്ക് മടങ്ങിക്കാണും..
അവറ്റകളെ കെട്ടിയിടാനും വെള്ളം കൊടുക്കാനും
ലായത്തിന് മുന്നില്‍ ആരുമുണ്ടായിരുന്നില്ല...
ആ വീടും താഴ്‌വരയും നിഗൂഢമായൊരു
നിശ്ശബ്ദതയിലേക്ക് ഉള്‍വലിഞ്ഞു..
അവളുടെ ഒച്ചപ്പാടുകള്‍ കേട്ടാണ്
ഇന്നലെ വരെ ആ വീടുണര്‍ന്നിരുന്നത്.
കുതിരകള്‍ക്ക് വെള്ളം കൊടുക്കുമ്പോള്‍
കശ്മീരിയില്‍ അവള്‍ പാടിയിരുന്ന
ആ പഴയ നാടോടിപ്പാട്ട് കേള്‍ക്കാന്‍
ഉമ്മ ജനാലക്ക് പുറകില്‍
ഒളിഞ്ഞു നില്‍ക്കാറുണ്ടായിരുന്നു..
ഒടുക്കം അവറ്റകളോട് കിന്നാരം പറഞ്ഞ്
അവളാ താഴ്‌വരയിലേക്ക് കയറിപ്പോവുന്നതും നോക്കി
അവരാ വീടിന്റെ ചുവരും ചാരി നില്‍ക്കും.
കുതിരകള്‍ ഇന്ന് അവരെ ആ ജനാലക്കു പുറകില്‍ കണ്ടില്ല...
ഇന്നലെ കെട്ടിയിടാത്തതുകൊണ്ട്
അവ കയറ് വലിച്ച് ലായത്തിന് പുറത്തിറങ്ങി
അവളെ ഒരിക്കല്‍ കൂടെ അന്വേഷിച്ച്
ആ ക്ഷേത്രത്തിന് മുന്നിലൂടെ അവ കുന്ന് കയറുകയാണ്.....
കുന്നിന്‍ ചെരുവില്‍ എവിടെയാണവള്‍ ഒളിഞ്ഞിരിക്കുന്നത്....
Comments