Search

ഒറ്റമൂലി

മൂര്‍ധാവ് കത്തുന്നു

വിലങ്ങുകള്‍

മുടിയഴിച്ചിട്ട ഭ്രാന്തിയെപ്പോലെ

തലതല്ലിച്ചിരിക്കുന്നു

 

കൂടിനില്‍ക്കുന്നവരൊക്കെയും

വെറും പൂതലുകള്‍

ഒച്ചയില്ലാത്ത

അനക്കമില്ലാത്ത

തൊട്ടാല്‍ വീഴുന്ന പൂതലുകള്‍

 

ഭൂതകാല സ്വര്‍ഗങ്ങളാണിപ്പോള്‍

അഭിരമിക്കുന്നത്

ചത്ത കുതിരകള്‍

പട്ടമഴിച്ചിട്ട ആനകള്‍

 

കുതിരപ്പന്തയങ്ങളിലെ

ആള്‍ക്കൂട്ടക്കൂവലുകള്‍

ഉശിര് പെറ്റ പൈക്കളെപ്പോലെ

നില്‍ക്കക്കള്ളിയില്ലാതെ

തുള്ളുന്നു

 

തലങ്ങും വിലങ്ങും

കുരുക്കുകള്‍

അഴിച്ചാലുമഴിച്ചാലും

അഴിയാത്ത 

തീരാക്കുരുക്കുകള്‍

മൂലക്കഴുക്കോല് മാറ്റാന്‍

ഒരു നേര്‍ത്ത 

കയറാണാദ്യം വാങ്ങിയത്

പിന്നെയതിന്റെ

പിരി കൂടിക്കൂടി വന്നു 

അഴിക്കുംതോറും

കൂടിക്കൊണ്ടിരിക്കുന്ന കുരുക്കുകള്‍

 

തുറിച്ചുനോക്കുന്ന കണ്ണുകള്‍

തെറിച്ചു വരുന്ന കല്ലുകള്‍

അട്ടഹാസം മുഴക്കുന്ന

കരിംഭൂതങ്ങള്‍

നിറം മാറിമാറിക്കളിക്കുന്ന

ഓന്തുകള്‍

പരിണാമങ്ങള്‍ക്കൊട്ടും

കാലവിളംബം വന്നിട്ടില്ല

 

പച്ചിലകള്‍ ചവച്ചരച്ച

പല്ലിടകളില്‍

തടിച്ചുകൂടിയ

മാംസത്തുണ്ടിന്

പുഛ ഭാവം

 

ആദ്യമൊന്ന് നിവരണം

നിവരണമെങ്കില്‍

എഴുന്നേല്‍ക്കണം

എഴുന്നേല്‍ക്കണമെങ്കില്‍

കൈ പൊങ്ങണം

കൈകളിലാണ്

കുരുക്കുകള്‍

 

കണക്കുകൂട്ടലുകള്‍ തെറ്റിയിട്ടില്ല

ഇതൊരു കൊലപാതകമാണ്

പ്രതികളില്ലാത്ത

കൊലപാതകം

ആത്മഹത്യയുടെ മണമുള്ള

പട്ടാപ്പകല്‍ കൊലപാതകം

 

കടം കേറി ആത്മഹത്യ

ചരമക്കോളം കണ്ട്

പിന്നാമ്പുറത്തിരുന്ന്

കുടിച്ച് മുള്ളുന്ന

വില്ലന്‍ ചിരിക്കുന്നുണ്ട്

രാക്ഷസന്റെ കൊലച്ചിരി

മൂക്കു കയറിടേണ്ട

തലച്ചോറുകള്‍

ചിതലരിക്കുകയോ

തണുത്തുറഞ്ഞുപോവുകയോ

ചെയ്തിട്ടുണ്ട്

അതുകൊണ്ടവരാണാദ്യം

കടപ്പെട്ടത്

അതുകൊണ്ടു തന്നെയാണവര്‍

രാവും പകലും തുറക്കുന്ന

കൊലക്കയര്‍ വിതരണശാലക്ക് മുന്നില്‍

ജനക്കൂട്ടത്തെ ക്യൂ നിര്‍ത്തി

വിപ്ലവത്തെ കുറിച്ച്

തീപ്പൊരി പറത്തുന്നത്

 

വിപ്ലവം തെരുവില്‍

മൂത്രമൊഴിച്ചു നടന്ന കാലത്ത്

കേമത്തം കാട്ടി

പച്ചപ്പരിഷ്‌കാരിയെന്ന

പേരു കിട്ടാന്‍

കുറ്റിക്കാട്ടില്‍ വലിച്ചെറിഞ്ഞ

ആ സഞ്ചിയുടെ കെട്ടഴിച്ച്

ജീവിതത്താളം പറയുന്ന

പുസ്തകമൊന്ന് തുറക്കണം

അതിലുണ്ട് പരിഹാരം

അല്ല

അതിലുള്ളതു മാത്രമാണ്

കാലങ്ങളായകപ്പെട്ട

ജീവിതക്കുരുക്കഴിക്കാനുള്ള

പച്ച മരുുന്നും ഒറ്റമൂലിയും