Search

ഉമ്മ

കറിയില്‍  മുങ്ങി

നീരു വറ്റി ഉണങ്ങി

പുറത്തിറങ്ങിയ

കറിവേപ്പില

വീണ്ടും തളിര്‍ത്ത് 

ചിരിച്ച് വരുന്നുണ്ട്

കറിക്ക് രുചി പകരാന്‍.

 

അലിഞ്ഞില്ലാതായ ഉപ്പ്

പാചകത്തിന് രസക്കൂട്ടൊരുക്കാന്‍

വീണ്ടും 

പാകത്തിലൊരുങ്ങിയെത്തിയിട്ടുണ്ട്.

 

മുളകും മല്ലിയും മഞ്ഞളും

തീര്‍ന്ന് പോകുന്നേയില്ലല്ലോ

അലമാരക്കകത്ത്

നിറയുന്നത് വീണ്ടും

വസന്തം തീര്‍ക്കാന്‍.

 

തിളച്ച് മറിഞ്ഞ് വെന്ത്

പാകമായെങ്കിലും

അരി ഒരുങ്ങിനില്‍കുന്നുണ്ട്

വീണ്ടും തിളച്ച 

വെള്ളത്തിലെടുത്തു ചാടാന്‍.

 

തീ എത്ര തിന്ന് തീര്‍ത്തിട്ടും

തീര്‍ന്ന് പോകാതെയീ 

വിറകുകൊള്ളി

പുകഞ്ഞ് കത്തിക്കൊണ്ടേയിരിക്കുന്നുണ്ട്

കെടാ വെളിച്ചമായ്.