Search

ഞങ്ങളുടെ രാഷ്ട്രത്തിലെ ബേട്ടികൾ

ഞങ്ങളുടെ രാഷ്ട്രത്തിലെ
വയലുകളിലിപ്പോൾ 
ഗോതമ്പോ ബാർലിയോ 
കടുകോ ചോളമോ
കതിരിടുന്നില്ല 

മുളക്കുന്നതൊക്കെയും
വാളുകൾ ത്രിശൂലങ്ങൾ
വെറുപ്പുകൾ ആക്രോശങ്ങൾ

പിന്നെ
മൂർച്ചയേറിയ
ഹിംസയുടെ ലിംഗങ്ങൾ

വയലിനു നടുവിൽ
ഒരുച്ച നേരത്ത്
ഉടുതുണിയില്ലാതെ
മരിച്ചവളുടെ ചോരയിൽ 
ഒരു മുദ്രാവാക്യം മുളക്കുന്നതും കാത്ത്
വിശന്നു മരിച്ച 
അവളുടെ പൈതലിന്റെ
കുട്ടിക്കുപ്പായത്തിന് 
രാജ്യപതാകയുടെ നിറം

ലിംഗത്തോട്ടങ്ങളിൽ നിന്നും
കണ്ടെടുത്ത 
കരിമ്പിൻ ചണ്ടി പോൽ 
ചവച്ചു തുപ്പിയ
അവളുടെ ജഡത്തിന് 
പീലി പറിച്ചെടുത്ത 
മയിലിന്റെ രക്തച്ചുവപ്പ്

മൗനമെന്ന രാഷ്ട്രത്തിലെ
ശബ്ദമെന്ന റേഡിയോ പാടിയ
ബേട്ടി ബച്ചാവോ എന്ന 
പാട്ടു കേട്ട് തഴമ്പിച്ച
അവളുടെ കാതുകളെ
ഇറുത്തെടുത്ത് ഞാൻ
മണിപ്പൂരിന്റെ മലയിടുക്കുകളിൽ 
മറവ് ചെയ്തു.

ബേട്ടീ... 
പൊറുക്കുക
നിന്റെ കേൾവിയെ വഞ്ചിച്ചതിന്
കുന്നോളം സ്വപ്നം കാണാൻ 
പ്രേരിപ്പിച്ചതിന്....
l