Search

ശഹാദത്ത്

നീ തന്ന
അത്തറിന്റെ സുഗന്ധത്തെക്കാൾ
ഇപ്പോൾ
ഇഷ്ടം തോന്നുന്നത്
നിന്റെ ശഹാദത്തിന്റെ
മണത്തിനാണ്
നീ എന്നും
ആവർത്തിക്കാറുള്ള
ജന്നത്തിലെ
പരിമളം
നാസാദ്വാരങ്ങളിൽ
ആകർഷണത്തിന്റെ
പുതുരുചി
പകർന്ന് നൽകുന്നുണ്ട്

എന്നോട് മിണ്ടുന്ന
ഓരോ വരിയിലും
ഞാനറിയാതെ
നീ ഒളിപ്പിച്ച് വെച്ചിരുന്ന
രക്തസാക്ഷിത്വത്തിന്റെ
അടങ്ങാത്ത ദാഹം
ഇപ്പോഴെനിക്ക്
വായിച്ചെടുക്കാനാവുന്നുണ്ട്
മലകുൽ മൗത്തിന്റെ
വരവിനെക്കുറിച്ച
നിന്റെ വർണനകൾ
അനുഭൂതി നിറഞ്ഞ
മറ്റൊരു ലോകത്തിലേക്ക്
എന്നെ കൂട്ടിക്കൊണ്ടു പോവുന്നുണ്ട്

കുളിക്കാതെ
പുതക്കാതെ
ചോരവാർന്ന
ഉടുമുണ്ടിൽ
അടക്കം ചെയ്യപ്പെടുന്നതിന്റെ
നീറ്റലിൽ നിന്ന്
പയ്യെപ്പയ്യെ
മുക്തനായിട്ടതിന്റെ
ഇഷ്ടതോഴനായി
നിൽക്കുമ്പോൾ
തെരുവിലെ
വിളക്കു കാലും
നെറ്റിത്തടത്തിലെ
വിയർപ്പു തുള്ളിയും
നിന്നിലേക്കുള്ള
നിറഞ്ഞ സാക്ഷ്യങ്ങളായി
പരിണമിക്കണമെന്നാണ്
പ്രാർഥിക്കുന്നത്

നീയെന്തുകൊണ്ടാവും
ഇത്രമേൽ
മോഹിപ്പിക്കുന്നതെന്ന്
ദേഹത്തെ മൂടിയ
ഉടയാടകളിൽ നിന്ന്
ഒരു നിമിഷം
മാറി നിന്നപ്പോഴാണ്
ബോധ്യപ്പെട്ടത്
റബ്ബുൽ ആലമീൻ
നിന്നിലലിഞ്ഞാൽ
പിന്നെയിവിടെയെന്ത്
സുബ്ഹാനല്ലാഹ്
നിത്യചൈതന്യമായി
അകതാരിലാ നൂറ്
കെടാതെ കത്തട്ടെ
അവിടം തൊടും വരെ.

l