ജമാഅത്തെ ഇസ്‌ലാമി വികസനത്തിന്റെ ശത്രു?
''വേഗ റെയിലിനെ എതിര്‍ക്കുന്നത് കേരളത്തെ പിറകോട്ടടിപ്പിക്കുന്ന വലതുപക്ഷക്കാരുടെ സംഘടിത ശ്രമമാണെന്ന് ഡി.വൈ.എഫ്.ഐ സംസ്ഥാന സെക്രട്ടറി എ.എ റഹീം. സംസ്ഥാനത്ത് ചില ശക്തികള്‍ എല്ലാ വികസന പ്രവര്‍ത്തനത്തിനും എതിരാണ്. അതിനു നേതൃത്വം നല്‍കുന്നത് ജമാഅത്തെ ഇസ്‌ലാമിയാണ്. അവര്‍ക്ക് രാഷ്ട്രീയ അജണ്ടയുണ്ട്. ശാസ്ത്ര സാഹിത്യ പരിഷത്തും ആര്.വി.ജി മേനോന്‍ അടക്കമുള്ള ഇടതുപക്ഷ സഹയാത്രികരും എതിര്‍ക്കുന്നില്ലേ എന്ന ചോദ്യത്തിന് ഈ അജണ്ട ജമാഅത്തെ ഇസ്‌ലാമിയുടേതാണെന്ന് റഹീം മറുപടി നല്‍കി. പരിഷത്തിന്റെ അഭിപ്രായം ശരിയാകണമെന്നില്ല. പാരിസ്ഥിതികാനുമതി കിട്ടിയാല്‍ എതിര്‍ക്കുന്നത് ശരിയല്ല. പരിസ്ഥിതി മൗലികവാദം യുദ്ധപ്രഖ്യാപനമാണ്. ജീവിക്കാന്‍ തൊഴിലവസരങ്ങള്‍ വേണം. അതിന് അടിസ്ഥാന സൗകര്യ വികസനം ഉണ്ടാവണം. ഏതു പദ്ധതി വന്നാലും പരിസ്ഥിതിയുടെ പ്ലക്കാര്‍ഡ് ഉയര്‍ത്തിപ്പിടിക്കുന്നത് ശരിയല്ല. പരിഷത്ത് നിലപാടിനെ ഡി.വൈ.എഫ്.ഐ എതിര്‍ക്കുമെന്നും റഹീം പറഞ്ഞു'' (മാധ്യമം 2021 ജൂലൈ 4).
''പദ്ധതിയുടെ സമഗ്ര പാരിസ്ഥിതികാഘാത പഠനം (ഇ.ഐ.എ) തയാറാക്കി പ്രസ്തുത രേഖയും വിശദ പദ്ധതി രേഖയും (ഡി.പി.ആര്) ജനങ്ങള്‍ക്ക് ചര്‍ച്ചക്കായി നല്‍കണമെന്നും അത്തരമൊരു ചര്‍ച്ച നടക്കും വരെ പദ്ധതി സംബന്ധിച്ച എല്ലാ പ്രവര്‍ത്തനങ്ങളും നിര്‍ത്തിവെക്കണമെന്നും ശാസ്ത്ര പരിഷത്ത് സംസ്ഥാന പ്രസിഡന്റ് എ.പി മുരളീധരനും ജനറല്‍ സെക്രട്ടറി എ. രാധനും പ്രസ്താവനയില്‍ സര്‍ക്കാറിനോട് ആവശ്യപ്പെട്ടു. പദ്ധതിയുടെ ഡി.പി.ആര്, സമഗ്ര ഇ.ഐ.എ എന്നിവ ജനങ്ങള്‍ക്കിടയില്‍ ചര്‍ച്ച നടത്തുന്നത് അടക്കമുള്ള പ്രാരംഭ നടപടികള്‍ പോലും പൂര്‍ത്തിയാക്കാതെ സില്‍വര്‍ ലൈനുമായി മുന്നോട്ടു പോകുന്നത് ആശാസ്യമല്ലെന്ന് പരിഷത്ത് കരുതുന്നു. അതിനാല്‍ കെ റെയിലുമായി ബന്ധപ്പെട്ട എല്ലാ നടപടികളും നിര്‍ത്തിവെക്കണമെന്നാണ് സംസ്ഥാന സര്‍ക്കാറിനോട് പ്രോജക്ട് മാനേജ്‌മെന്റിനോടും പരിഷത്ത് ഉന്നയിക്കുന്ന ആവശ്യം'' (മാധ്യമം 2021 ജൂലൈ 4).
എന്താണ് കെ റെയില്‍?
പിണറായി വിജയന്‍ ഒന്നാമൂഴത്തില്‍ തുടങ്ങിവെച്ചതും രണ്ടാമൂഴം ആരംഭിച്ചിരിക്കെ എന്ത് വില കൊടുത്തും നടപ്പാക്കിയേ തീരൂ എന്ന് തീരുമാനിക്കുകയും ആ ദിശയിലുള്ള നടപടികളുമായി മുന്നോട്ടു പോവുകയും ചെയ്തിരിക്കുന്ന കെ റെയില്‍ എന്ന സ്വപ്ന പദ്ധതി എന്താണെന്നും അതുവഴി ലക്ഷ്യമിടുന്ന നേട്ടങ്ങളെന്താണെന്നും ലഘുവായെങ്കിലും മനസ്സിലാക്കിയിരിക്കേണ്ടതാവശ്യമാണ്. കേരള സര്‍ക്കാറും ഇന്ത്യന്‍ റെയില്‍വേയും സംസ്ഥാനത്തിന്റെ ഭാവി റെയില്‍വേ വികസനത്തിനായി രൂപവത്കരിച്ച 'കേരള റെയില്‍വെ വികസന കോര്‍പ്പറേഷന്‍' എന്ന കെ റെയില്‍ കമ്പനി ആണ് സില്‍വര്‍ ലൈന്‍ ആസൂത്രണം ചെയ്തു നടപ്പിലാക്കാന്‍ നിര്‍ദേശിക്കപ്പെട്ട ഔദ്യോഗിക ഏജന്‍സി. തലസ്ഥാനമായ തിരുവനന്തപുരം നഗരത്തോട് ചേര്‍ന്നുള്ള കൊച്ചുവേളിയില്‍നിന്നും 11 ജില്ലകളിലായി 10 സ്റ്റേഷനുകളിലൂടെ മണിക്കൂറില്‍ ശരാശരി 150 കിലോ മീറ്റര്‍ വേഗത്തില്‍ സഞ്ചരിച്ച് കാസര്‍കോട്ട് വരെ 529.45 കിലോമീറ്റര്‍ നീളത്തിലാണ് സില്‍വര്‍ ലൈന്‍ വിഭാവനം ചെയ്തിരിക്കുന്നത്. പദ്ധതിയുടെ മൊത്തം ചെലവ് 64941 കോടി രൂപയായി കണക്കാക്കിയിരിക്കുന്നു. തിരുവനന്തപുരം മുതല്‍ കാസര്‍കോട്ട് വരെ ഓടിയെത്താന്‍ നാല് മണിക്കൂര്‍ (നിലവില്‍ 9 മുതല്‍ 12 വരെ) കഴിയുമെന്നാണ് അവകാശവാദം. സംസ്ഥാനത്തിന്റെ തെക്കും വടക്കും ചുരുങ്ങിയ സമയം കൊണ്ട് ബന്ധിപ്പിക്കാന്‍ വേണ്ടിയുള്ള സ്വപ്ന പദ്ധതിയായാണ് ഇതിനെ വിശേഷിപ്പിക്കുന്നത്. പദ്ധതിയുടെ ഭാഗമായി പുതിയൊരു സര്‍വീസ് റോഡും അഞ്ച് ടൗണ്‍ഷിപ്പുകളും നിര്‍മിക്കും. ടൗണ്‍ഷിപ്പുകളുടെ വികസനത്തില്‍ മുതല്‍മുടക്കാന്‍ ചില പ്രമുഖ നിക്ഷേപ സ്ഥാപനങ്ങള്‍ മുന്നോട്ടു വന്നിട്ടുണ്ട്. 1457 രൂപക്ക് (വര്‍ഷം തോറും 7.5 ശതമാനം വര്‍ധനയോടെ) തിരുവനന്തപുരത്തു നിന്ന് കാസര്‍കോട്ട് എത്താം എന്നതാണ് ഇതിന്റെ ഒരു പ്രധാന സവിശേഷതയായി പറയുന്നത്. ട്രെയ്‌നിന്റെ ശരാശരി വേഗം മണിക്കൂറില്‍ 150 കിലോ മീറ്ററും പരമാവധി വേഗം മണിക്കൂറില്‍ 200 കിലോമീറ്ററും ആയിരിക്കും.
10 സ്റ്റേഷനുകളാണ് ഉള്ളതെങ്കിലും 28 ഫീഡര്‍ സ്റ്റേഷനുകളിലേക്ക് ഹ്രസ്വദൂര ട്രെയ്‌നുകളുമുണ്ടാവും. 2024-25-ല്‍ 67740 ദിവസ യാത്രക്കാരും 2051-ല്‍ 147120 യാത്രക്കാരും ഉണ്ടാകുമെന്നാണ് പ്രതീക്ഷിക്കുന്നത്. നിര്‍മാണ വേളയില്‍ 50000 പേര്‍ക്കും സ്ഥിരമായി 10000 പേര്‍ക്കും തൊഴില്‍ ലഭിക്കും. സില്‍വര്‍ ലൈന്‍ പദ്ധതി ആഗോള താപനം കുറക്കാന്‍ സഹായിക്കുമെന്നും ഇതിനായി ഏറ്റെടുക്കേണ്ട ഭൂമി 1383 ഹെക്ടറും കുടിയൊഴിപ്പിക്കപ്പെടുന്ന കെട്ടിടങ്ങളുടെ എണ്ണം 9134 ആയിരിക്കും എന്നും കമ്പനി രേഖകള്‍ പറയുന്നു. കെ റെയില്‍വേ മന്ത്രാലയത്തിന്റെ കീഴിലായിരിക്കും (രവിശങ്കര്‍ കെ.വി, മാധ്യമം ആഴ്ചപ്പതിപ്പ് 2021 ജൂലൈ 12, 'കേരളത്തെ തകര്‍ക്കാന്‍ വീണ്ടുമൊരു സ്വപ്ന പദ്ധതി').
Comments