Search

ഒടുവില്‍

ഇത്തിരി നേരത്തെ

വിശ്രമത്തിനു വന്നോരൊക്കെയും

ഒത്തിരി വാഴാന്‍

കൊതിക്കുന്നു ഭൂവിതില്‍ നിത്യവും

 

ഒത്തിരി വാഴുവാനാര്‍ക്കും

മണ്ണില്ലിവിടെന്ന നേരിനെ

എത്രയും വേഗം മറക്കുന്നു

ജന്മങ്ങളധികവും

 

ആശ മോഹാഗ്രഹങ്ങളൊക്കെയും

നിലത്തിട്ടു പോയോരു

പൂര്‍വികര്‍ തന്‍ ചരിതങ്ങളൊന്നും

പാഠമാവുന്നില്ലൊട്ടുമേ

പിന്നാലെ ഗമിക്കുന്ന

സാധുജനങ്ങള്‍ക്കൊരിക്കലും

 

കൈയിലൊതുങ്ങുന്ന

തിത്രയും നില്‍ക്കവെ 

കൈയെത്താ ദൂരത്തുള്ളത് മോഹിച്ച്

ജീവിച്ചു തീര്‍ക്കാതെ

കാലം കഴിക്കുന്നു

മര്‍ത്യ ജന്മങ്ങളധികവും ജനനിയില്‍

 

അമ്മയെ വിഴുങ്ങുവാന്‍

വാ പിളര്‍ന്നങ്ങിനെ നില്‍ക്കവെ

ജനനത്തിന്‍ കൂടെയായ്

കൊണ്ടുവന്നില്ലൊന്നുമേയെന്ന

പരമ സത്യത്തെ

മറന്നു പോകുന്നു

ജീവനുള്ള കാലമത്രയും മാനവന്‍

 

ജീവന്‍ നിലക്കുവാന്‍

നേരമായെങ്കിലോ

പരിഭവക്കെട്ടുകള്‍

തുറന്നു പുലമ്പുന്നു

കിട്ടിയിട്ടില്ലൊട്ടുമേ

ജീവിച്ചു തീര്‍ക്കുവാന്‍

നേരവും കാലവും

വേണ്ടത്ര ഭൂമിയില്‍