Search

അന്യമാവുന്ന തിരിച്ചറിവുകള്‍

ശബ്ദത്തേക്കാള്‍ താളം

നിശബ്ദതക്ക്

കാഴ്ചയേക്കാള്‍ ഭംഗി

അന്ധതക്ക്

രുചിയേക്കാള്‍ രുചി

ചവര്‍പ്പിന്

സ്പര്‍ശനത്തേക്കാള്‍ അടുപ്പം

അകല്‍ച്ചയ്ക്ക്

ഗന്ധത്തേക്കാള്‍ ഗന്ധം

ദുര്‍ഗന്ധത്തിന്

ശബ്ദവും

കാഴ്ചയും

രുചിയും

ഗന്ധവും

സ്പര്‍ശനവും

സ്വന്തത്തേക്കള്‍

ആസ്വാദ്യമാവുന്നത്

അന്യന്റെ സമീപത്തില്‍.

സ്വന്തമെന്നതൊന്നുമില്ല

എല്ലാം പണം നല്‍കി

വാങ്ങിയത്. 

 

 

 

 

***************************************************

 

 

 

 

അലിഫ്

-സി.കെ മുനവ്വിര്‍-

 

 

അലിഫ് കണ്ടിട്ടുണ്ടോ

അങ്ങനെ

മെലിഞ്ഞിട്ട്

കൊലുന്നനെ

നെഞ്ചു വിരിച്ച്

 

അതിനു പിന്നിലായാണ്

ഇരുപത്തേഴെണ്ണം

 

തലകുത്തി വീണത്

വളവുള്ളത്

തിരിവുള്ളത്

കീഴ്‌മേല്‍ മറിഞ്ഞത്

വാലുചുരുണ്ടത്

തല ചെരിഞ്ഞത്

കുത്തുള്ളതും

കുത്തില്ലാത്തതും

 

ഇതിനെയെല്ലാം നയിക്കുന്നത്

ആ ഒറ്റ ഒരുത്തനാണ്

അലിഫ്,

 

എന്നിട്ടും

അലിഫിതുവരെ കുനിഞ്ഞിട്ടില്ല

ചാഞ്ഞിട്ടില്ല

ചെരിഞ്ഞിട്ടില്ല

തലകുത്തി വീണിട്ടില്ല

ആടിയിട്ടില്ല

ഉലഞ്ഞിട്ടു പോലുമില്ല

 

നെഞ്ചു വിരിച്ചങ്ങനെ നില്‍ക്കുന്നു

ഒറ്റ നില്‍പ്പ്

പ്രലോഭനങ്ങള്‍

പേമാരി കണക്കെ പെയ്തിട്ടുണ്ട്

പ്രകോപനങ്ങള്‍

തീഗോളങ്ങളായെരിഞ്ഞിട്ടുണ്ട്

എന്നിട്ടുമനങ്ങിയിട്ടില്ല

പിണങ്ങിപ്പിരിഞ്ഞു പോയിട്ടില്ല

വഴക്കിട്ടോടിയിട്ടില്ല

ഇരിക്കാമെന്ന് നിനച്ചിട്ടു പോലുമില്ല

 

അലിഫ്

പാഠത്തിന്റെ തുടക്കം മാത്രമല്ല

പാഠപുസ്തകവും കൂടിയാണ്.