മാഞ്ഞുപോയൊരു വാക്ക് (പാലത്തായി പെണ്‍കുട്ടിക്ക്)
1
ആദ്യ പിരീഡില്‍
ആദ്യ ബെഞ്ചിലിരുന്ന്
ആദ്യം നീ മനഃപാഠമാക്കിയ
കാവ്യമേതായിരുന്നു?
ഗുരുദേവോ ഭവ!
ഹൃദയം തുറന്നുപിടിച്ച്
ആദ്യം കണ്ട കാഴ്ച?
അക്ഷരക്കൂട്ടുകളുടെ
നൃത്തച്ചുവടുകളോ!
ഒടുവില്‍ നീ
മായ്ച്ചുകളഞ്ഞത്
ഏതു വാക്കായിരുന്നു?
നീതി.....!
2
എഴുതിത്തീരാത്ത
പുസ്തകത്താളില്‍ നീയൊരു
ക്ലാസ് മുറി വരയ്ക്കുക.
വിഷം തീണ്ടിയ പദങ്ങളെ
മായ്‌ച്ചെഴുതാന്‍ വെള്ളിപ്പച്ചകള്‍
മുളപ്പിക്കുക.
കരുണ വറ്റാത്ത
സകല പദങ്ങളെയും
ഭൂമിയില്‍നിന്നും കൊള്ളയടിച്ച്
നിന്റെ ക്ലാസ് മുറിയിലെ
അന്തേവാസിയാക്കുക.
3
ചായപ്പെന്‍സില്‍ മുനകള്‍
കടുംനിറം കുടിച്ച പൂക്കളെ
നിന്റെ കൈവിരലാല്‍
വിരിയിക്കുന്നു.
ഓരോ പൂവിനും
നീതി, ദയ, കരുണ,
സമത്വം, ആര്‍ദ്രത, അലിവ്
എന്നിങ്ങനെ പേര്.
വാടാത്ത
ഓരോ പൂക്കളെയും
നീ ഹൃദയത്തില്‍ ചൂടുക.
4
കണ്ണുനീര്‍ ചാലിലൂടെ
കടലാസുവഞ്ചി തുഴഞ്ഞ്
നീ വന്നത്
നിയമപുസ്തകത്തിലെ
തലയെടുപ്പുള്ള പദങ്ങളെ
തൊട്ടുണര്‍ത്താനോ?
അത്
മമ്മികളാണ്!
Comments