Search

ഉറക്കമുണർത്തുന്ന കനവുകൾ

ഖാലിദ്
ഉറക്കമുണർന്ന
കിനാക്കളിലെ
അമരക്കാരനാണ്
എനിക്കിന്ന് നീ

പൂമേനി പൊട്ടി
രക്തം വാർന്ന
രണാങ്കണത്തിൽ
ശത്രു പക്ഷത്തിന്റെ
നായകനായിരുന്നു നീ

മനസ്താപം
ഇളക്കി മറിച്ച
നിമിഷം മുതൽ
നീ പാഞ്ഞു കയറിയത്
സൂര്യതാപത്തിലുണങ്ങാത്ത
കനവുകളുടെ
ഉച്ചസ്ഥായിയിലേക്കായിരുന്നുവല്ലോ

ഉയർന്നു പൊങ്ങിയ
ഖഡ്ഗത്തിൽ
നിലം പൊത്തിയ
ശത്രു സങ്കേതങ്ങളേക്കാൾ
ആവേശമേറ്റുന്നത്
കടലിരമ്പങ്ങൾക്ക് മുന്നിലും
പതറാതെ നിൽക്കുന്ന
നിന്റെ തവക്കുലിൻ
കനത്തിനാണ്

നിങ്ങൾ ജീവിതം
കൊതിക്കുന്നതിലേറെ
തീവ്രമായ്
മരണം കൊതിക്കുന്നൊരു കൂട്ടർ
തമ്പടിച്ചിട്ടുണ്ട്
മറുകരയിൽ
രാജാവിനയച്ച കത്തിലെ
നിന്റെ വരികൾ
നിന്റെ നാക്കിൻ തുമ്പിലൂടൊരിക്കൽ
വാമൊഴിയായിക്കേട്ടീടണം
അത്രമേൽ
ധീരമാണാ കുഞ്ഞു വരികൾ

ഖാലിദ്
ഉമർ നിനക്കയച്ച കത്തും
കൈയിൽ പിടിച്ച്
അവസാന നിമിഷം വരെ
നായകനായി
വിജയാനന്തരം
സുസ്മേര വദനനായി
നായകസ്ഥാനത്തിന്റെ
പടിയിറക്കം
അന്ന് നിന്നെ
അബൂ ഉബൈദ പുണർന്നതിനേക്കാൾ
ചൂടോട് കൂടെ
എനിക്കൊന്ന് പുണരണം
ആ വീര്യത്തിലൊന്നും
ചോരാതെ
ആവാഹിക്കാൻ കഴിയുവോളം.

l