മുജാഹിദ് പ്രസ്ഥാനം മുരട് പൂതലിച്ചാല്‍ തളിര്‍ക്കുമോ?
മുജാഹിദ് പ്രസ്ഥാനത്തിന് ശക്തമായി തിരിച്ചുവരാനുള്ള ആന്തരിക ശേഷിയുണ്ടെന്ന ടി.റിയാസ്മോന്റെ വീക്ഷണം (ലക്കം 48) അമിത ശുഭാപ്തിയാണ്. കാലത്തിന്റെ വളര്‍ച്ചക്കനുസരിച്ച് വികസിക്കാന്‍ സാധിക്കാതിരിക്കുകയും സമൂഹത്തിന്റെ വളര്‍ച്ചയെ അംഗീകരിക്കാതിരിക്കുകയും ചെയ്തതാണ് പ്രസ്ഥാനത്തെ ഇന്നത്തെ അവസ്ഥയിലെത്തിച്ചതെന്നും വക്കം അബ്ദുല്‍ ഖാദര്‍ മൌലവിയുടെ തുടര്‍ച്ച പുതിയ മൌലവിമാരില്‍ ഇല്ലാതായിപ്പോയതാണ് ഇന്നത്തെ ദുരവസ്ഥക്ക് വഴിവെച്ചെതെന്നുമുള്ള അഭിപ്രായം ശരിയാണ്.
കാലഘട്ടത്തിന്റെ ചുമരെഴുത്ത് വായിക്കാന്‍ കഴിയാത്ത അന്ധമായ അനുകരണത്തെ ശക്തമായെതിര്‍ത്തു കൊണ്ടാണ് മുജാഹിദ് പ്രസ്ഥാനം കടന്നു വന്നത്. മുജാഹിദ് പ്രസ്ഥാനത്തിന്റെ ആദ്യകാല പ്രസിദ്ധീകരണങ്ങളും പ്രഭാഷണങ്ങളുമെല്ലാം അന്ധമായ അനുകരണത്തെ(തഖലീദ്)യും അന്ധമായ വിരോധത്തെയും ശക്തമായെതിര്‍ക്കുന്നതായിരുന്നു. നാല് മദ്ഹബുകള്‍ നിലവില്‍ വന്നതോടെ ഇജ്തിഹാദിന്റെ കവാടം അടഞ്ഞു പോയെന്ന യാഥാസ്ഥിതിക വാദത്തെ മുജാഹിദു പ്രസ്ഥാനം തിരുത്താന്‍ ശ്രമിച്ചു.
വ്യക്തമായ പ്രമാണങ്ങളുടെ പിന്‍ബലത്തോടെത്തന്നെയായിരുന്നു 'സമസ്ത'യുടെ എതിര്‍പ്പിനെ അന്ന് മുജാഹിദ് പ്രസ്ഥാനം നേരിട്ടത്. വലിയ ഗ്രന്ഥശേഖരം അന്നത്തെ മുജാഹിദ് സ്റേജുകളുടെ സവിശേഷതയായിരുന്നു. കിതാബുകള്‍ ഉയര്‍ത്തിപ്പിടിച്ച് വാചകങ്ങള്‍ വായിച്ച് വെല്ലുവിളിച്ച് കൊണ്ടുള്ളതായിരുന്നു മുജാഹിദ് പണ്ഡിതന്മാരുടെ പ്രഭാഷണങ്ങള്‍. ഏറെക്കുറെ പ്രാമാണികവും വൈജ്ഞാനികവുമായിരുന്നു വിഷയാവതരണവും സംവാദങ്ങളും. ഇവിടെ യാഥാസ്ഥിതികര്‍ പതറി. കുതന്ത്രങ്ങളിലൂടെ ഇതിനെ മറികടക്കാനാണവര്‍ ശ്രമിച്ചത്. വാക്കുകള്‍ വളച്ചൊടിച്ചും കൂക്കിവിളിച്ചുമുള്ള യാഥാസ്ഥിതിക അടവുകള്‍ പൊതുജനങ്ങളിലെ ബുദ്ധിയുള്ളവര്‍ മനസ്സിലാക്കി. ഞങ്ങള്‍ ഇരുപക്ഷത്തിന്റെ വാദങ്ങളും ഒരു പോലെ കേള്‍ക്കാന്‍ സന്നദ്ധരാണെന്നും നിങ്ങള്‍ അതിനൊരുക്കമാണോ എന്നുമുള്ള മുജാഹിദ് നേതാക്കളുടെ വെല്ലുവിളി സുന്നി പണ്ഡിതന്മാരെ വെട്ടിലാക്കി.
അങ്ങനെ പൊതുജനങ്ങളിലെ ചിന്തിക്കുന്ന പലരും മുജാഹിദ് പക്ഷത്തേക്ക് മാറി. മലബാറിന്റെ പല ഭാഗങ്ങളിലും മുജാഹിദ് പ്രസ്ഥാനത്തിന് വേരോട്ടം കിട്ടിയത് ഇങ്ങനെയാണ്. ചിന്താപരമായ ഈ ഉണര്‍വ് തന്നെയാണ് വിദ്യാഭ്യാസ രംഗത്തും മുന്നേറ്റങ്ങള്‍ക്ക് വഴിയൊരുക്കിയത്. എന്നാല്‍ ഇടക്ക് മുജാഹിദ് പ്രസ്ഥാനത്തിലേക്ക് കയറിവന്ന കടുത്ത സംഘടനാ പക്ഷപാതിത്വവും അസഹിഷ്ണുതയും സംഘടനയെ ഇന്നത്തെ അവസ്ഥയിലെത്തിക്കുകയായിരുന്നു. പ്രസ്ഥാനത്തെ അടിമുടി ഗ്രസിച്ച് കഴിഞ്ഞ ഈ ഗുരുതര രോഗം കടന്നുവന്ന വഴിയന്വേഷിച്ച് അടിസ്ഥാന ചികിത്സ നടത്താതെ, ജീര്‍ണാവസ്ഥയില്‍ നിന്ന് അത് തളിര്‍ത്ത് വരുന്നതും കാത്തിരിക്കുന്നത് പാഴ്വേലയാകും.
സംഘടനാ പക്ഷപാതിത്വവും അസഹിഷ്ണുതയും കടന്നുവന്ന വഴിയന്വേഷിക്കുമ്പോള്‍ അതില്‍ സുപ്രധാനമായതൊന്ന് ജമാഅത്തെ ഇസ്ലാമിയോട് സ്വീകരിച്ച നിലപാടില്‍ നിന്നുണ്ടായതാണെന്ന് കാണാം. ജമാഅത്തെ ഇസ്ലാമിയോട് സത്യസന്ധവും സൌഹൃദപൂര്‍ണവുമായ സമീപനമായിരുന്നു ഏറെക്കുറെ ആദ്യകാല മുജാഹിദ് നേതാക്കള്‍ക്ക് ഉണ്ടായിരുന്നത്. തെറ്റുദ്ധാരണമൂലം വല്ല വിമര്‍ശനവും നടത്തിയാല്‍ തിരുത്താനും അവരില്‍ ചിലര്‍ സന്നദ്ധരായിരുന്നു. കെ.എം.മൌലവിയുടെ സത്യസന്ധമായ നിലപാടിനെ എ.കെ അബ്ദുല്ലത്വീഫ് മൌലവി ഞങ്ങള്‍ക്ക് ക്ളാസ്സെടുക്കുമ്പോള്‍ പ്രശംസാപൂര്‍വം അനുസ്മരിക്കാറുണ്ടായിരുന്നു.
അന്ന് എ.കെ അബ്ദുല്ലത്വീഫ് മൌലവി കേരള നദ്വത്തുല്‍ മുജാഹിദീന്‍ ജനറല്‍ സെക്രട്ടറിയായിരുന്നു. കെ.എം മൌലവി പ്രസിഡന്റും. ജമാഅത്തിനെ സംബന്ധിച്ച് കെ.എം മൌലവി അല്‍മുര്‍ശിദില്‍ നടത്തിയ ഒരു പരാമര്‍ശം തെറ്റായിപ്പോയെന്ന് അദ്ദേഹത്തിന് പിന്നെ ബോധ്യം വന്നു. 'നമുക്ക് ജമാഅത്ത് അമീര്‍ ഹാജി സാഹിബിനടുത്തു പോയി മാപ്പു ചോദിക്കാം' എന്ന് കെ.എം മൌലവി അബ്ദുല്ലത്വീഫ് മൌലവിയോട് പറഞ്ഞു. 'ചെന്ന് മാപ്പ് ചോദിക്കുകയൊന്നും വേണ്ട, അടുത്ത ലക്കം അല്‍മുര്‍ശിദില്‍ ഒരു ഖേദപ്രകടനം നടത്തിയാല്‍ മതി' എന്ന് അബ്ദുല്ലത്വീഫ് മൌലവി പറഞ്ഞു.
മറ്റൊരോര്‍മ, എ. അലവി മൌലവിയെക്കുറിച്ചാണ്. ജാമിഅഃ നദ്വിയ്യ സ്ഥാപിതമായ കാലം. ജമാഅത്തെ ഇസ്ലാമിയെ സംബന്ധിച്ച് വലിയ ചര്‍ച്ച കേട്ടുകൊണ്ടാണദ്ദേഹം ക്ളാസ്സിലേക്ക് കയറിവരുന്നത്. സ്വതസിദ്ധ ശൈലിയിലദ്ദേഹം പറഞ്ഞു: "എടോ, നാമും നമ്മുടെ സഹോദരങ്ങളായ ജമാഅത്തുകാരും തമ്മില്‍ അഞ്ചു ശതമാനം കാര്യത്തില്‍ മാത്രമാണ് അഭിപ്രായ വ്യത്യാസം''. പള്ളി, മദ്റസ തുടങ്ങിയവയുടെ നടത്തിപ്പിലും ഇരു കൂട്ടരും പലപ്പോഴും സഹകരിച്ചിരുന്നതുമാണ്. എന്നാല്‍ അടിയന്തരാവസ്ഥക്കാലത്താണ് ഈ അവസ്ഥക്ക് കാര്യമായ മാറ്റമുണ്ടാകുന്നത്. അടിയന്തരാവസ്ഥയില്‍ ജമാഅത്തെ ഇസ്ലാമി നിരോധിക്കപ്പെട്ടു. നേതാക്കള്‍ ജയിലിലടക്കപ്പെട്ടു. ഈ അവസരം ഉപയോഗപ്പെടുത്തി പാര്‍ട്ടി വളര്‍ത്തിയെടുക്കാമെന്നും ജമാഅത്തുകാരെ ഒഴിവാക്കി പള്ളികള്‍ സ്വന്തമാക്കാമെന്നും മറ്റും മുജാഹിദുകളില്‍ ചിലര്‍ ചിന്തിച്ചു. കോഴിക്കോട്ട് മുജാഹിദ് സെന്റര്‍ നിര്‍മിക്കാനും തദാവശ്യാര്‍ഥം നേതാക്കളുടെ സംഘം പര്യടനങ്ങള്‍ നടത്തി സഹായസഹകരണങ്ങള്‍ അഭ്യര്‍ഥിക്കാനും തീരുമാനമായി.
മുജാഹിദ് നേതാക്കളുടെ ഈ പര്യടനം അണികളെ ആവേശം കൊള്ളിച്ചു. ജമാഅത്ത്വിരുദ്ധ വികാരം ഇളക്കിവിട്ടുകൊണ്ടുള്ളതായിരുന്നു അത്. വിവേകശാലികളായ മുന്‍നിര നേതാക്കള്‍ മരണപ്പെടുകയോ ശയ്യാവലംബികളാവുകയോ ചെയ്ത ഈ ഘട്ടത്തില്‍ ജമാഅത്ത്വിരുദ്ധനായ ഒരു മൌലവി ആവേശഭരിതനായി തന്റെ പ്രസിദ്ധീകരണം വേണ്ടത്ര ഉപയോഗപ്പെടുത്തി പള്ളികള്‍ മുജാഹിദ് സെന്ററില്‍ അഫിലിയേറ്റ് ചെയ്തു. കോഴിക്കോട് ടൌണിലടക്കമുള്ള പള്ളികളില്‍ നിന്ന് ജമാഅത്ത് സാന്നിധ്യം ഒഴിവാക്കി. പരസ്പരം സഹകരിച്ച് നടത്തിയിരുന്ന ചില പള്ളികള്‍ സ്വന്തമാക്കി.
അടിയന്തരാവസ്ഥയാണല്ലോ ഈ 'നേട്ടങ്ങള്‍' എല്ലാം ഉണ്ടാക്കിത്തന്നത്. അതിനാല്‍ അടിയന്തരാവസ്ഥ ഏര്‍പ്പെടുത്തിയ ഇന്ദിരാഗാന്ധിയുടെ ദീര്‍ഘായുസിന് വിശുദ്ധ കഅ്ബയില്‍ ചെന്ന് പ്രാര്‍ഥിക്കാന്‍ വരെ ഇതദ്ദേഹത്തിന് ആവേശം നല്‍കി. 'യുവാക്കളെ ജമാഅത്ത് വിരുദ്ധരാക്കിയെടുക്കാനായിരുന്നു ഞാന്‍ പ്രസിദ്ധീകരണമാരംഭിച്ചതെന്നും അത് സാധിച്ചതിനാല്‍ പ്രസിദ്ധീകരണം നിര്‍ത്തുകയാണെന്നും' മൌലവി അവസാന ലക്കത്തിലെഴുതി.
അടിയന്തരാവസ്ഥ നീങ്ങി ജമാഅത്ത് കരുത്തോടെ രംഗത്ത് വന്നതോടെ ജമാഅത്ത്വിരുദ്ധ വിഭാഗം അടിസ്ഥാനരഹിതമായ കുപ്രചാരണങ്ങള്‍ നടത്താനാരംഭിച്ചു. യുവ പണ്ഡിതന്മാരാണതില്‍ മുന്‍പന്തിയിലുണ്ടായിരുന്നത്. ജമാഅത്ത് ഗ്രന്ഥങ്ങളില്‍ നിന്ന് വാചകങ്ങള്‍ അടര്‍ത്തിയെടുത്ത് ദുര്‍വ്യാഖ്യാനം ചെയ്തു കൊണ്ടുള്ള വിമര്‍ശനം മുമ്പ് സുന്നികള്‍ മുജാഹിദിന് നേരെ നടത്തുന്ന രീതിയെക്കാള്‍ തരംതാണതായിരുന്നു.
തീരെ പരിസരബോധമില്ലാതെ എന്തും വിളിച്ച് പറയുന്ന തരംതാണ ശൈലിയിലാണ് യുവ പ്രസംഗകരുടെ വിമര്‍ശനം മുന്നോട്ടു പോയത്. ഉദാഹരണത്തിന്: 'ബാങ്ക് വിളി തന്നെ വിപ്ളവത്തിന്റെ വചനങ്ങളാണ്' എന്ന മൌദൂദിയുടെ വചനം വായിച്ചു കേള്‍പിച്ച് കൊണ്ട് ഒരു പൊതുയോഗത്തില്‍ യുവമുജാഹിദ് പ്രസംഗകന്‍ പറഞ്ഞു: 'ഇതാ മൌദൂദി പറയുന്നത് കേട്ടില്ലേ. ബാങ്ക് വിളി കേട്ടാല്‍ മടവാളെടുത്ത് ഹിന്ദുക്കളെ കൊല്ലാന്‍ ഇറങ്ങണമെന്ന്!' ധാരാളം അമുസ്ലിം സഹോദരങ്ങളും ശ്രേതാക്കളായ സദസ്സിലാണദ്ദേഹം ഇതെല്ലാം പറയുന്നത്.
ചുരുക്കത്തില്‍, അന്ധമായ വിരോധവും സംഘടനാ പക്ഷപാതിത്വവും ആമൂലാഗ്രം ഗ്രസിച്ചത് പ്രസ്ഥാനത്തെ വല്ലാത്ത പതനത്തിലാണെത്തിച്ചത്.
ഈ ഘട്ടത്തിലാണ് പ്രസ്ഥാനം നെടുകെ പിളരുന്നത്. ഇരു വിഭാഗവും ചേരിതിരിഞ്ഞ് പരസ്യമായി വിഴുപ്പലക്കാന്‍ തുടങ്ങി. മലപ്പുറം ജില്ലയിലെ പുളിക്കല്‍ ഈ വിഴുപ്പലക്കലില്‍ വീര്‍പ്പുമുട്ടിയ പ്രദേശമാണ്. മറ്റു പ്രദേശങ്ങളും ഏറെക്കുറെ ഇങ്ങനെത്തന്നെ. ഇതൊന്നും തടയാന്‍ അവരില്‍ നിന്നാരും രംഗത്ത് വരുന്നുമില്ല.
അടിസ്ഥാന മാറ്റത്തിനും തിരുത്തലിനും തയാറാകാതെ പുറമെ വെള്ളപൂശാന്‍ എല്ലാ ഗ്രൂപ്പുകളും ചില സുന്ദര മുദ്രാവാക്യങ്ങളുമായി കാമ്പയിനുകളും യാത്രകളും നടത്താറുണ്ട്. ഇതെല്ലാം കാന്തപുരം മുസ്ലിയാരുടെ 'മാനവികതയെ ഉണര്‍ത്തല്‍' യാത്രപോലെ പാഴ്വേലയായിത്തീരുകയാണ്.
Comments