Search

ജീവനില്ലാത്ത കുപ്പായങ്ങള്‍

നൂറ്റാണ്ടുകള്‍ക്കു മുമ്പ്

കുഴിച്ചിട്ട

വിഷജന്തുക്കള്‍

പുതുജീവന്‍ വെച്ച്

ഫണം വിടര്‍ത്തിയാടുന്നു

 

പൂത്തുകായ്ച്ച മരങ്ങള്‍

ഞൊടിയിടയില്‍

ജലം ലഭിക്കാതെ

ശ്വാസം മുട്ടി തൊണ്ട വരണ്ട്

മരിക്കുന്നു

 

ഉള്ളിലൊളിച്ചവ

ഉളുപ്പില്ലാതെ

മറനീക്കി പുറത്തുവരുന്നു

നവോത്ഥാനം

പദങ്ങളില്‍ തപസ്സിരിക്കുന്നു

 

ഇത് എട്ടുകാലി

മമ്മൂഞ്ഞിമാരുടെ വസന്തകാലം

ആരാന്റെ ഗര്‍ഭംതാങ്ങികളെ കൊണ്ട്

പുറത്തിറങ്ങി നടക്കാന്‍ വയ്യ

 

ഇവിടെ പിടിക്കപ്പെട്ടവന്‍ മാന്യന്‍

പിടികൊടുക്കാത്തവന്‍ രാജാവ്

നട്ടുച്ചക്കിറങ്ങി

ഇത് പാതിരാവാണെന്നു പറഞ്ഞ്

സാധുജനത്തെ വഞ്ചിക്കുന്നു

നാനാജാതി വേഷം പൂണ്ട

ആള്‍ദൈവ സംഘങ്ങള്‍

 

മിണ്ടരുത് പോലും

മതമിടപെടുമത്രെ

ആദ്യം കൂച്ചുവിലങ്ങിട്ടത്

ജീവനുള്ള മതത്തിന്

അപ്പോള്‍ പിന്നെ

കൈകാലുകളരിഞ്ഞെടുത്ത്

ശിരസ്സറുത്ത്

കുത്തനെ നിര്‍ത്തപ്പെടുന്ന മതം

പേടിപ്പിക്കുന്ന മതം തന്നെ

സംശയമില്ല

 

വേലി തുളച്ച് പുറത്തുവരുന്ന

വൃദ്ധ മാതാവിനെ 

ആര്‍ക്കും കാണണ്ട

ചുമരില്‍ തറച്ച

അസ്ഥിപഞ്ജരങ്ങളാരെയും

അസ്വസ്ഥമാക്കുന്നില്ല

 

ഇളം ചോരക്കും വിലയില്ല

നിലവിളിക്കും വിലയില്ല

എല്ലാവര്‍ക്കും കുപ്പായം മതി

കറുപ്പും വെളുപ്പും

പച്ചയും ചുകപ്പും

മഞ്ഞയും കാവിയും

നിറമുള്ള കുപ്പായങ്ങള്‍

 

ഈ കുപ്പായത്തില്‍

ചോരയുണ്ടെന്ന്

ഈ കുപ്പായത്തിന്

ഓട്ടയുണ്ടെന്ന്

ഈ കുപ്പായങ്ങള്‍ക്ക്

ജീവനില്ലെന്ന്

ഉറക്കെപ്പാടാന്‍

നേരമായിരിക്കുന്നു..